ပြီးခဲ့သော ရက်ပိုင်းအတွင်းက ပုဂ္ဂလိက ဘဏ်တစ်ခုနှင့် ပတ်သက်သော ကောလာဟလ တစ်ရပ်ကြောင့် တစ်နိုင်ငံ လုံးရှိ အဆိုပါ ဘဏ်ခွဲများတွင် ငွေထုတ်သူများနှင့် ပြည့်နှက် သွားခဲ့ပါသည်။ ကုန်ခဲ့သည့် ၂၀၁၁ ခုနှစ်ကလည်း အဆိုပါ ဘဏ်ခွဲနှင့် ပတ်သက်သော ကောလာဟလ တစ်ခု ထွက်ခဲ့ပြီးဖြစ်ပါသည်။ မြန်မာနိုင်ငံတွင် ကောလာဟလများ ထွက်ပေါ်လာတိုင်း ကောလာဟလ အပေါ် ပြည်သူလူထုက တုန့်ပြန်ပုံမှာ နှစ်မျိုးနှစ်စား ရှိပါသည်။ ပထမတစ်မျိုးမှာ ကောလာဟလ သတင်းကို ကိုယ်တိုင် ယုံကြည် သကဲ့သို့ဖြစ်ပြီး ဆက်လက် ဖြန့်ဝေကာ တုန့်ပြန်ခြင်း နှင့် ဒုတိယ တစ်မျိုးမှာ ကောလာဟလကို သံသယ စိတ်ဖြင့် ဆင်ခြင် သုံးသပ် တုန့်ပြန်ခြင်း ဖြစ်ပါသည်။
များစွာသော လူတို့သည် ပထမ အမျိုးအစား တွင်သာ ပါဝင်ပြီး အနည်းငယ်သော လူတို့သည်သာ ဒုတိယ အမျိုးအစားတွင် ပါဝင်ပါသည်။ မြန်မာနိုင်ငံတွင် ပထမ အမျိုးအစား ရှိသူတို့သည် ကောလာဟလ ထွက်ထွက်ချင်း ဆန်၊ ဆီ၊ ဆား ကဲ့သို့ အခြေခံ စားကုန်များ ပမာဏ များများ ဝယ်ယူ သိုလှောင်ထားခြင်း၊ ဘဏ်ကောလာဟလ ဖြစ်ပါက ဘဏ်ရှိငွေများ အပြေးအလွှား ထုတ်ယူခြင်း စသဖြင့် ပြုမူတတ်ကြပါသည်။ ဒုတိယ အမျိုးစားကမူ သတင်း အချက်အလက် ခိုင်မာမှု ရှိမရှိ စောကြောစုံစမ်းကာ ခိုင်လုံ တိကျမှု မရှိပါက မိမိနှင့် ပတ်ဝန်းကျင်ရှိ သူများကို စိုးရိမ်သောက မဖြစ်ကြရန် အကျိုးအကြောင်းသင့် ရှင်းပြတတ်သူများ ဖြစ်ပါသည်။ ဤနေရာတွင် ပထမ အမျိုးအစားနှင့် ဒုတိယ အမျိုးအစား ကွာခြားချက်မှာ ဆင်ခြင် ချင့်ချိန် သုံးသပ် စဉ်းစားနိုင်မှု စွမ်းရည်ဖြစ်ပါသည်။
မှန်ပါသည်။ အသိပညာရေချိန် အပေါ် မူတည်ကာ ကြုံတွေ့လာသော အခက်အခဲ၊ ပြဿနာများကို ရင်ဆိုင်ကြသည်မှာ သက်ရှိ သတ္တဝါတို့၏ ဗီဇစိတ် ဖြစ်ပါသည်။ လူသားတို့ အတွက်မူ တိရိစ္ဆာန်များထက် သာလွန်သော စဉ်းစား တွေးခေါ်မှုများ ရှိပါသည်။ ယင်းမှာ အများအတွက်၊ မိမိ ပတ်ဝန်းကျင်အတွက်၊ မိမိ နိုင်ငံအတွက်နှင့် မိမိ လူ့အဖွဲ့အစည်း အတွက်၊ လူသား လူ့ဘောင် လောက တစ်ခုလုံး အတွက် စသဖြင့် ထည့်သွင်း စဉ်းစားမှု များစွာ ရှိပါသည်။ ထိုသို့ ထည့်သွင်း စဉ်းစားနိုင်မှု စွမ်းရည် များစွာ မြင့်မားသူများသည် ပြီးခဲ့သော ရက်ပိုင်းက ထွက်ပေါ်ခဲ့သော ဘဏ်ကောလာဟလမျိုး ဆိုပါက ထိုဘဏ်တွင် အပ်နှံထားသော မိမိပိုင်နှင့် မိမိ ကုမ္ပဏီ၊ အဖွဲ့အစည်းပိုင် ငွေများကို ထုတ်ယူခြင်း မပြုသည့်အပြင် အခြေအနေရှိပါက နောက်ထပ် တိုးမြှင့် အပ်နှံခြင်း၊ ငွေစုစာအုပ် အသစ်ဖွင့်ခြင်း တို့ဖြင့် အားပေး ကူညီသည့် သဘောမျိုး အထိ တုန့်ပြန် တတ်ကြပါသည်။ ကောလာဟလကြောင့် ဘဏ်တစ်ခု အခြေအနေ ဆိုးသွားပါက လောက်လောက် လားလား စီးပွားရေး အင်အား မရှိသေးဘဲ နည်းလမ်း ပေါင်းစုံဖြင့် ရပ်တည်ရန် ကြိုးစားနေရသော မြန်မာနိုင်ငံ ပုဂ္ဂလိကဘဏ် လောကကြီး တစ်ခုလုံးပါ ဒိုမီနိုသီအိုရီ သဘော အရ ဆင့်ကဲ ထိခိုက် သွားနိုင်စရာ ရှိနေပါသည်။ ထိုအခြေအနေကို ပုဂ္ဂိုလ်ရေး အာဃာတ၊ နာကြည်းမှုနှင့် အလဲထိုးလိုစိတ်တို့ဖြင့် ရည်ရွယ်ချက်ချက် ရှိရှိ ကောလာဟလ ထုတ်လွှင့်သူတို့ နားလည်နိုင်စွမ်း ရှိမည် မဟုတ်ပေ။
အခြား တစ်ဖက်တွင်လည်း နိုင်ငံ၏ လက်ရှိ ဒီမိုကရေစီ အပြောင်းအလဲများကြောင့် အခွင့်အရေး၊ လုပ်ပိုင်ခွင့်၊ ရာထူး၊ စည်းစိမ်များ လျော့ပါးသွားမည်ဟု အစိုးရိမ်ကြီး နေသူများက ဒီမိုကရေစီ အပြောင်းအလဲကို လိုလားနှစ်သက်ခြင်း မရှိဘဲ နည်းမျိုးစုံဖြင့် ခုခံ တတ်ကြပါသည်။ အခုအခံများသူတို့က ဒီမိုကရေစီ အသွင်ပြောင်းကာလ မြန်မာနိုင်ငံ၏ အဓိက ဒေါက်တိုင်ကြီးနှစ်ခု ယိုင်နဲ့ သွားစေရန် ရည်ရွယ်ချက် ရှိရှိ ကောလာဟလ ထုတ်လွှင့်ခြင်းမျိုး ဆိုပါက နိုင်ငံသားအားလုံး အထူး သတိကြီးကြီး ထားရန် လိုပါသည်။ မသိစိတ်ဖြင့် ကောလာဟလကို သံယောင်လိုက်ကာ အစိုးရိမ်ကြီးကြီး မတုံ့ပြန်ကြရန် လိုပါသည်။ မိမိပိုင် ငွေကို ဘဏ်မှ ထုတ်မယူခြင်းဖြင့် ယင်းဘဏ်တစ်ခုတည်းကိုသာမက နိုင်ငံတော်၏ ဘဏ်လုပ်ငန်း နယ်ပယ်ကြီး တစ်ခုလုံးကိုပါ အကူအညီပေးရာ ရောက်ပါသည်။ ယင်းဘဏ်တွင် ငွေထပ်မံ အပ်နှံခြင်း၊ ငွေစုစာအုပ် အသစ်ဖွင့်ခြင်းဖြင့်လည်း နိုင်ငံ တည်ဆောက်ရေး လုပ်ငန်းစဉ် ကြီးတွင် တစ်ထောင့် တစ်နေရာမှ ကူညီ နိုင်ပါသည်။
ဘဏ်တို့၏ အခြေခံ သဘောမှာ အပ်နှံငွေများကို အခြားတစ်ဖက်တွင် လုပ်ငန်းလုပ်ကိုင်သူများကို ပြန်လည် ထုတ်ချေးခြင်း ဖြစ်ပါသည်။ ထို့ထက် ပိုလွန်စွာ ပြောရပါက ဘဏ်တို့သည် ပြည်သူလူထု အပ်နှံ ငွေများကို နိုင်ငံတွင်း လှည့်ပတ် သုံးစွဲမှုများ မြန်ဆန် သွက်လက်စေရန်၊ အလုပ်အကိုင် အခွင့်အလမ်းများ တိုးပွားလာစေရန်၊ နိုင်ငံသား တစ်ဦးချင်းစီ၏ ဝယ်ယူ သုံးစွဲနိုင်စွမ်း မြင့်မား လာစေရန် ဆပွားနည်းဖြင့် ဖြန့်ဝေ သုံးစွဲနေခြင်း ဖြစ်ပါသည်။ ထို့ကြောင့် ဘဏ်တိုင်းတွင် အပ်နှံထားသော ငွေပမာဏ အတိုင်း ရှိမနေကြပါ။ တစ်ချိန်တည်း၊ တစ်ရက်တည်းတွင် အပ်နှံထားသော ငွေများကို အလုံးအရင်း လာထုတ်ပါက မည်သည့်ဘဏ်မျှ ကြာကြာ ထုတ်ပေးနိုင်မည် မဟုတ်ပေ။ ကောလာဟလကြောင့် ဘဏ်တစ်ခု အခြေအနေဆိုးသွားပါက ချိတ်ဆက်နေသော ဘဏ်လုပ်ငန်းနှင့် ငွေကြေးလောက၊ ဘဏ္ဍာရေး နယ်ပယ်နှင့် စီးပွားရေး ကဏ္ဍကြီး တစ်ခုလုံး ထိုမှသည် နိုင်ငံရေး အကြပ်အတည်း အထိ ဆိုက်ရောက်သွားနိုင်ပါသည်။ ထိုအခြေအနေကို သိရှိသူ စေတနာဆိုး ရှိသူ အချို့က ရည်ရွယ်ချက် ရှိရှိ ကောလာဟလ ထုတ်လွှင့် တတ်သည်ကို နိုင်ငံသား အားလုံး အမျိုးသားရေး စိတ်ဓာတ် အခြေခံကာ စဉ်းစား ဆင်ခြင်ဉာဏ်ဖြင့် သတိရှိရှိ တုံ့ပြန်ကြရန် လိုပါသည်။
နိုင်ငံတစ်ခု အချိန်တို အတွင်း ကြီးပွား တိုးတက်ရန်မှာ ထိုနိုင်ငံ၏ နိုင်ငံရေးနှင့် စီးပွားရေး ကဏ္ဍနှစ်ရပ်က အထူး အရေးကြီးပါသည်။ ထို့အတူ ထိုကဏ္ဍ နှစ်ရပ်သည် အပြန်အလှန် အားဖြင့် အမှီသဟဲ ပြုနေရပါသည်။ လက်ရှိ မြန်မာနိုင်ငံ၏ အပြောင်းအလဲများကို ကြည့်လျှင်ပင် စီးပွားရေး မူဝါဒများကို ဗွေဆော်ဦး ပြုပြင် ဖြေလျှော့ ပေးခဲ့သည်ကို တွေ့မြင် နိုင်ပါသည်။ နိုင်ငံများစွာ တို့၏ စီးပွားရေးသည် ထိုနိုင်ငံတို့ရှိ ငွေကြေးဆိုင်ရာ မူဝါဒနှင့် ဘဏ္ဍာရေး ပေါ်လစီ တို့က အခရာ ကျပါသည်။ ထိုနှစ်ခုကို ထောက်မ ပေးထားသည်မှာ ဘဏ်စနစ် ဖြစ်ပါသည်။ ထိုဘဏ်စနစ် အပေါ် ပြည်သူလူထု၏ ယုံကြည်မှု လျော့ကျ သွားပါက ကြီးမားသော စီးပွားရေး ပြဿနာနှင့် ရင်ဆိုင် ရတတ်ပါသည်။ ထိုသို့ မဖြစ်စေရန်အတွက် အစိုးရ၏ အုပ်ချုပ်မှုနှင့် လွတ်ကင်းသော ဗဟိုဘဏ် စနစ်ဖြင့် မျှခြေဖြစ်အောင် ထိန်းကွပ် ရပါသည်။ မြန်မာနိုင်ငံတွင်လည်း အခြေခံအားဖြင့် ထိုအတိုင်း ကျင့်သုံး သော်လည်း ဗဟိုဘဏ်မှာမူ ယနေ့အထိ သီးခြား မဖြစ်သေးပေ။
နှစ်ပေါင်း အတန်ကြာ ပွင့်လင်းမြင်သာမှု မရှိသော စနစ်အောက်တွင် နေထိုင် လာခဲ့သော မြန်မာနိုင်ငံသားများ အစိုးရိမ် သောကကြီးကာ ကောလာဟလများကို ယုံမှတ်မှား တတ်ခြင်းကိုလည်း အပြစ်တင်၍ မရပါ။ မကြာသေးခင်က ဖြစ်ခဲ့သော ဘဏ်ကောလာဟလ တွင်လည်း စနစ်ဆိုး၏ သြဇာ သက်ရောက်မှုကြောင့် သံသစိတ်ကြီး နေဆဲ မြန်မာပြည်သူ အချို့ အစိုးရိမ်ကြီးစွာ ငွေများ ထုတ်ယူ ခဲ့ကြသော်လည်း ယင်းစနစ်ဆိုးနှင့် မတူသော ပွင့်လင်းမြင်သာမှု ရှိလာသည့် မီဒီယာများနှင့် သက်ဆိုင်ရာ ပုဂ္ဂလိကဘဏ်၊ ဗဟိုဘဏ်တို့က ချက်ချင်း ဆိုသလို သတင်းထုတ်ပြန် ရှင်းလင်း ခဲ့ကြသဖြင့် အချိန်တိုအတွင်း ပြန်လည် တည်ငြိမ်သွားခဲ့ပါသည်။
ကောလာဟလများသည် ပွင့်လင်းမြင်သာမှု မရှိခဲ့သော စနစ်ဆိုး တို့တွင်သာ နိုင်ငံအပေါ် ထိခိုက်မှု ကြီးမားနိုင်ပြီး ပွင့်လင်းမြင်သာမှု ရှိလာသော ဒီမိုကရေစီ လူ့အဖွဲ့အစည်း တို့တွင်မှု ထိခိုက်မှု နည်းပါး တတ်ပါသည်။ များစွာအရေးကြီးသည်မှာ ကောလာဟလကို တုံ့ပြန်သော ပြည်သူလူထု၏ အသိပညာ ရေချိန်ဖြစ်ပါသည်။ အမျိုးသားရေး စိတ်ဓာတ်ဖြင့် တစ်တပ်တစ်အား ပါဝင် ကူညီနိုင်ခြင်း မရှိလျှင်ပင် မိမိကြောင့် ဘဏ်လောက၊ ငွေကြေး ပေါ်လစီ၊ ဘဏ္ဍာရေး ပေါ်လစီနှင့် စီးပွားရေး၊ နိုင်ငံရေး ကဏ္ဍကြီးများ ထိခိုက် မသွားစေရန် နိုင်ငံသား တစ်ယောက်အနေနှင့် တာဝန် ရှိနေပါကြောင်း အထူး သတိပေးလိုပါသည်။
အယ်ဒီတာ (၁၁-၁၀-၂၀၁၂)
The Voice Weekly
No comments:
Post a Comment